Gjatë shtatzënisë duhet ta përgatitni një çantë me gjëra të ndryshme të cilat do t’ju duhen kur të shkoni në spital. Në këtë çantë duhet të keni:

• Letrat e ekzaminimeve dhe të analizave të cilat i keni bërë në vizitat antenatale
• Shllafurk dhe papuqe
• Dy ose tre jeleka
• Një paketim me binde superabsorbuese
• Pesë ose gjashtë palë brekë jo të reja
• Neseserin me brushën e dhëmbëve, pastën e dhëmbëve, krehërin etj
• Dy peshqira
• Letra freskuese
• Kartë telefoni
• Ndonjë libër, revistë, MP3 player ose iPod me muzikën tuaj të preferuar në mënyrë që ta kaloni kohën dhe të relaksoheni
• Dy bluza të gjera me mëngë të shkurtëra
• Një deodorans
• Teshat dhe pelenat për beben
• Termometër për beben

Ju duhet të shkoni në spital nëse keni këto shenja:

• KONTRAKSIONE TË RREGULLTA.

Gjatë gjithë shtatzënisë ju mund të keni shtrëngime në bark – këto janë kontraksionet Braxton Hicks. Si shenjë se lindja ka filluar është kur kontraksionet paraqiten çdo 5 minuta, zgjasin rreth 60 sekonda dhe bëhen gjithnjë e më të forta. Gradualisht kontraksionet do të zgjasin më tepër, do të jenë më të forta dhe më të shpeshta.

• GJAKRRJEDHJA NGA VAGINA.

Pak para lindjes del nga vagina një copë mukusi i përzier me sasi të pakët gjaku. Nëse humbni më tepër gjak kjo është shenjë rreziku dhe menjëherë duhet të shkoni në spital.

• PËLCITJA E UJORIT

Bebja juaj brenda në mitër noton në ujë. Në momentin kur pëlcasin cipat e ujorit duhet të shkoni në spital.

Shpeshherë gratë shtatzëna kanë frikë kur shkojnë në spital për të lindur. Kanë frikë nga vetë dhimbjet e lindjes, nuk e dinë se a do të bëjnë tamam atë që duhet gjatë lindjes, kanë frikë për shëndetin e vet dhe për shëndetin e bebes etj. Duhet ta dini se gati të gjitha gratë shtatzëna kanë këtë frikë – kjo duhet t’ju bëjë që të ndjeheni më lehtë!Mos harroni që në spital të merrni të gjitha letrat e ekzaminimeve dhe të analizave të cilat i keni bërë në vizitat antenatale. Sapo të mbërrini në spital do të shkoni në dhomën e pranimit. Aty mjeku do t’ju ekzaminojë që nënkupton:

• Do t’ju kontrollon pulsin, do t’ju matë temperaturën, do t’ju kontrollojë shtypjen e gjakut dhe do t’ju kontrollojë urinën
• Do t’ju palpojë (prekë) barkun për të parë pozicionin e bebes dhe do të dëgjojë të rrahurat e zemrës së bebes
• Do të bëjë ekzaminimin e brendshëm për të kontrolluar sa është zgjeruar qafa e mitrës.

Këto ekzaminime mund të përsëriten edhe disa herë tjera gjatë lindjes. Gjithmonë bëni pyetje për çdo gjë që ju intereson!

Lindja i ka katër faza. Në fazën e parë zgjerohet (dilatohet) qafa e mitrës. Në fazën e dytë bebja del kah vagina jashtë. Në fazën e tretë del placenta. Faza e katërt quhet faza pasplacentare.